Fjarðarmótið 2019 fer fram 29. september

Fjarðarmótið 2019 verður haldið í Ásvallalaug 29. september næstkomandi. Það hefst með sundsýningu yngstu krakkanna klukkan 10:30. Upphitun mótsins hefst svo klukkan 12:00 og mótið sjálft klukkan 13:00. Á mótinu verður synt samkvæmt sundreglum IPC. Keppt verður í eftirtöldum greinum:

25m skriðsund (með aðstoð ef þarf)
50m skriðsund
50m baksund
50m bringusund
50m flugsund
100m skriðsund
100m baksund
100m bringusund
100m flugsund
100m fjórsund
400m skriðsund
4x50m blandað boðsund

Skráningar má senda á fjordursport@fjordursport.is.
Skráningargögn eru hér.

Fréttamolar að hausti

Sundæfingar eru nú komnar á fullt og allir hópar byrjaðir að æfa. Nokkrar breytingar hafa orðið á þjálfaraliðinu okkar, Ingibjörg Ólafsdóttir hefur tekið við sem yfirþjálfari og sér hún um þjálfun hákarla og sverðfiska. Marinó Ingi Adolfsson mun verða henni til aðstoðar með Hákarlana og Garpana og Hjörtur Már Ingvarsson mun áfram sinna þjálfun Sverðfiska ásamt Ingibjörgu. Konný Ottesen verður með æfingar Höfrunganna og Aníta Ósk Hrafnsdóttir verður áfram til aðstoðar. Örlitlar breytingar hafa orðið á æfingatímunum en miðhópurinn (Sverðfiskar) mun æfa á mánudögum, miðvikudögum og föstudögum klukkan 18 – 19. Garpar munu æfa á þriðjudögum og fimmtudögum klukkan 18 – 19 og æfingar Höfrunga (yngsta hópsins) munu hefjast hálftíma síðar en áður, þ.e. klukkan 17:30 – 18:30 en á sömu stöðum og áður. Hákarlarnir æfa á sama tíma og áður. Allar upplýsingar um æfingatímana má nálgast hér. Opnað verður fyrir skráningar fljótlega.

Þrír Fjarðarliðar, þeir Róbert Ísak Jónsson, Hjörtur Már Ingvarsson og Guðfinnur Karlsson, taka þátt á heimsmeistarmóti fatlaðra í sundi sem fer fram í London 9. – 15. september. Íþróttasamband fatlaðra hefur verið með skemmtilegar kynningar á sundmönnunum og má sjá þær á ifsport.is. Við óskum þeim að sjálfsögðu góðs gengis.

Róbert Ísak Jónsson var á dögunum tilnefndur af JCI hreyfingunni á Íslandi sem einn af 10 framúrskarandi ungum Íslendingum. Róbert Ísak sem er aðeins 18 ára hefur nú þegar afrekað margt og er heimsmeistaratitill og silfur á Evrópumóti aðeins lítið brot af afrekaskránni hans.

Fjarðarmótið verður svo haldið í Ásvallalaug 29. september næstkomandi þannig að takið dagsetninguna frá.

Róbert Ísak og Tanya Elisabeth íþróttamenn Fjarðar

Fjörður hélt uppskeruhátíð sína þriðjudaginn síðastliðinn 4. júní. Þar fá allir iðkendur viðurkennningu fyrir veturinn og þeir sem skara fram úr fá aukaverðlaun. Við breyttum svo aðeins út af vananum og skellutm upp pylsupartýi í stað hefðbundna kökuhlaðborðsins. Myllan gaf okkur pylusbrauðin og þökkum við þeim kærlega fyrir það. Róbert Ísak Jónsson og Tanya Elisabeth Jóhannsdóttir voru valinn íþróttamaður og íþróttakona Fjarðar. Að vanda var það góðvinur félagsins, Gissur Guðmundsson sem gaf bikarana. Kristrún Helga, fyrir sund, og Hlynur, fyrir boccia, fengu svo hvatningarbikarana þetta árið. Nokkrar myndir frá hátíðinni má sjá hér að neðan.

Róbert Ísak setti Íslandsmet og vann til sex verðlauna á Ítalíu

Mynd fengin af facebook síðu Róberts Ísaks

Mynd fengin af facebook síðu Róberts Ísaks


Róbert Ísak Jónsson tók um helgina þátt á opna ítalska meistarmótinu og stóð sig að vanda geysilega vel. Hann vann til tveggja gullverðlauna, einna silfurverðlauna og þrennra bronsverðlauna. Einnig setti hann nýtt Íslandsmet í 100m baksundi í flokki S14 þegar hann synti á 1:06,49. Sannarlega glæsilegur árangur hjá Róberti sem undirbýr sig af krafti undir Paralympics leikana í Tokyo 2020 en fylgjast má með framgangi hans á Facebook síðu hans og hvetjum við alla til að líka við síðuna hans.